Payaam Leke Jo Aayi Saba Madine Se Naat Lyrics

Payaam leke jo aayi saba Madine se
Marize Ishq ki laayi dawa Madine se

Mile humare bhi dil ko jilaa Madine se
Ke mehro maah ne paayi ziya Madine se

Tumhari ek jhalak ne kiya use dilkash
farogh husn ne paayi Shaha Madine se

Bata de koi kisi aur se bhi kuch paaya
Jise mila jo mila woh mila Madine se

Tamam shaaho gada pal rahe hai us dar se
Mili jahaan ko rozi sadaa Madine se

Woh aaya khuld me jo aa gaya Maine me
gaya woh khuld se jo chal diya Madine se

Na chain paayega ye ghamzada kisi soorat
Mareeze gham ko milegi shifa Madine se

Lagao dil ko na duniya me har kisi shai se
Ta'alluq apna ho Kaabe se ya Madine se

Chaman se phool khile murda dil bhi jee utthe
Naseem khuld se aayi hai ya Madine se

Madina chasmaye aabe hayaat hai yaaron
Chalo humesha ki le lo baqaa Madine se

Humare dil ko to bhaaya hai Taiba hi zaahid
Tumhe hai Makka to hoga siwaa Madine se

Chale jo Taiba se muslim to khuld me pahuche
Ki seedha khuld ka hai raasta Madine se

Tumhare qadmon pe sar sadqe jaa(n) fida ho jaaye
Na laaye phir mujhe mera Khuda Madine se

Teri Habeeb ka pyara chaman kiya barbaad
Ilahi nikle ye najdi bala Madine se

Tere naseeb ka Noorie milega tujh ko bhi
Le aaye hissa ye shaaho gada Madine se

© Naat Sharif - Naat Lyrics, Hamd, Naats, Manqabats, Salaams., AllRightsReserved.

Maintained by Naat Sharif Channel