Sarwar Kahoon Ki Maaliko Maula Kahoon Tujhe Naat Lyrics

Sarwar kahoon ki maaliko Maula kahoon tujhe
Baaghe khaleel ka tujhe zaiba kahoon tujhe

Hirmaa(n) naseeb hoon tujhe ummeed gah kahoon
Jaane muraade kaane tamanna kahoon tujhe

Gulzaare quds ka gule rangee adaa kahoon
Darmaane darde bulbule shaida kahoon tujhe

Subhe watan pe shame ghareeba(n) ko du sharaf
Bekas Nawaz gesuo waala kahoon tujhe

Allah re tere jisme munawwar ki taabishe(n)
Aye jaane jaa(n) main jaane tajalla kahoon tujhe

Be daag laalah ya qamare be kalaf kahoon
Be khaar gulbune chaman-aaraa kahoon tujhe

Mujrim hoon apne afw ka saamaa(n) karoon Shaha
Ya’ni Shafi e roze jazaa ka kahoon tujhe

Is murda dil ko muzda hayate abad ka doon
Taabo tabaano jaane maseeha kahoon tujhe

Tere to wasf aibe tanahee se hain baree
Hairaa(n) hoon mere Shah main kya kya kahoon tujhe

Keh legi sab kuch unke sana khwaa(n) ki khamoshi
Chup ho raha hai keh ke main kya kya kahoon tujhe

Lekin Raza ne khatme sukhan is pe kar diya
Khaaliq ka banda khalq ka Aaqa kahoon tujhe

© Naat Sharif - Naat Lyrics, Hamd, Naats, Manqabats, Salaams., AllRightsReserved.

Maintained by Naat Sharif Channel