Peshe Haq Muzda Shafa'at Ka Sunaate Jaayenge Naat Lyrics

Peshe haq muzda shafa’at ka sunaate jaayenge
Aap rote jaayenge hum ko hansaate jaayenge

Dil nikal jaane ki jaa hai aah kin aankhon se woh
Hum se pyaso ke liye dariya bahate jaayenge

Kusht-gaane garmiye mehshar ko woh jaane maseeh
Aaj daaman ki hawa de kar jilaate jaayenge

Gul khilega aaj ye unki naseeme faiz se
Khoon rote aayenge hum muskurate jaayenge

Haan chalo hasrat zado sunte hain woh din aaj hai
Thi khabar jis ki ki woh jalwa dikhaate jaayenge

Aaj eide aashiqaa(n) hai gar Khuda chahe ki woh
Abroo e paiwasta ka aalam dikhaate jaayenge

Kuch khabar bhi hai faqeero aaj woh din hai ki woh
Ne’mate khuld apne sadqe mein lutaate jaayenge

Khaak uftado bas un ke aane hi ki der hai
Khud woh gir kar sajda mein tum ko uthate jaayenge

Wus’ate di hain Khuda ne daamane Mehboob ko
Jurm khulte jaayenge aur woh chupaate jaayenge

Lo woh aaye muskurate hum aseeron ki taraf
Khirmane isyaa(n) par ab bijli giraate jaayenge

Aankh kholo ghamzado dekho woh giryaa(n) aaye hain
Lauhe dil se naqshe gham ko ab mitaate jaayenge

Sokhta jaano(n) pe woh purjoshe rehmat aaye hain
Aabe kausar se lagi dil ki bujhaate jaayenge

Aaftaab unka hi chamkega jab auro(n) ke charaag
Sar-sare joshe balaa se jhil-milaate jaayenge


Paaye koobaa(n) pul se guzrenge teri aawaaz par
Rabbe sallam ki sadaa par wajd laate jaayenge

Sarware dee(n) leeje apne na-tawaano ki khabar
Nafso shaitaa(n) Sayyida kab tak dabaate jaayenge

Hashr tak daalenge hum paidaaishe Maula ke dhoom
Misle faaras najd ke qil-ae giraate jaayenge

Khaak ho jaaye(n) adoo jal kar magar hum to Raza
Dam mein jab tak dam hai zikr unka sunaate jayenge

© Naat Sharif - Naat Lyrics, Hamd, Naats, Manqabats, Salaams., AllRightsReserved.

Maintained by Naat Sharif Channel