Madina Aane Waala Hai Lyrics

Sambhal jaa aye dile muztar madina aane wala hai
Lutaa aye chashme tar gohar madina aane wala hai

Qadam ban jaaey mera sar madina aane wala hai
Bichhoon reh mai nazar ban kar madina aane wala hai

Jo dekhein un ka naqshe paa khuda se woh nazar maangoon
Charaghe dil chaloon lekar madina aane wala hai

Karam unka chalaa yoon dil se kehta raahe taiba mein
Dile muztar tasalli kar madina aane wala hai

Nichaawar hai madine ki yeh mera dil meri aankhen
Nichaawar hoon madina par madina aane wala hain

Ilaahi main talabgaare fanaa hoon khaake taiba main
Ilaahi kar nisaare dar madina aane wala hai

Madine ko chala main beniyaaze rehbare manzil
Rahe taiba hai khud rehbar madina aane wala hai

Mujhe kheenche liye jaataa hai shouqe kooncha'e jaana
Khinchaa jaata hoon mein yaksar madina aane wala hai

Woh chamka gumbade khazraa woh shaire pur ziya aaya
Dhale ab noor main pekar madina aane wala hai

Jahaan se bekhabar ho kar chalo khulde madina main
Chalo ab hosh ki peekar madina aane wala hain


Madeene mein khule baabe hayaate nau batarze nau
Badal daalo kohan daftar madina aane wala hai

Zara aye markabe umre rawaan chal barq ki soorat
Dikha parwaaz ke jowhar madina aane wala hai

Talabgaare madina tak madina khud hi aajaaye
Tu duniya se kinaara kar madina aane wala hai

Madina aagaya ab der kya hai sirf itni si
Tu khaali kar yeh dil ka ghar madina aane wala hai

Falak shaayad zameen par rehgaya khaake guzar bankar
Bichhe hai raah mein akhtar madina aane wala hai

Gubaare raahe anwar kis qadar purnoor hai Akhtar
Tani hai noor ki chaadar madina aane wala hai.

© Naat Sharif - Naat Lyrics, Hamd, Naats, Manqabats, Salaams., AllRightsReserved.

Maintained by Naat Sharif Channel