Meri Saari izzat Muhammad Se hai
Ye daulat ye shohrat Muhammad se hai
Ye mera sukhan ye meri khamoshi
Qalam ki ye rif’at Muhammad se hai
Mujhe chahte hai sabhi toot kar
Ye nazre inayat Muhammad se hai
Hai thandak nigaho me aur noor bhi
Dilo me hararat Muhammad se hai
Na kyun saara aalam ho un par fida
Ke aalam me rehmat Muhammad se hai
Abu Bakr Siddique ka martaba
Aur inki sadaqat Muhammad se hai
Woh Farooq e Aazam Umar ba safa
Aur unki adaalat Muhammad se hai
Hussain Ibne Haider ki har ek ada
Aur unki shahadat Muhammad se hai
Woh meraj o meelad ki sa’ate
Woh khalwat ye jalwat Muhammad se hai
Woh Roza Namaz ho ke Haj o zakaat
Ye zauke ibaadat Muhammad se hai
Tilawat sakhawat duroodo salaam
Sabhi me halawat Muhammad se hai
Woh Gaus o Qutub hon ke Abdaal hon
Sabhi ki karamat Muhammad se hai
Sana unki shewa hai Rizwan ka
Ise khaas nisbat Muhammad se hai
Sallallahu Alaihi wa Aalihi wa sallam….