Hum Khaak Hai Aur Khaak Hi Naat Lyrics



Hum khaak hai aur khaak hi maawa hai humara
Khaki to woh Adam jade aala hai humara

Allah hume khaak kare apni talab me
Ye khaak to Sarkaar se tamga hai humara

Jis khaak pe rakhte the qadam Sayyide aalam
Us khaak pe qurbaa dile shaida hai humara

Kham ho gayi pushte falak is ta’ne zamee se
Sun humpe Madina hai woh rutba hai humara

Usne laqabe khaak Shehenshah se paaya
Jo Haidare Karraar ki Maula hai humara

Aye muddaiyon! Khaak ko tum khaak na samjhe
Is khaak me madfu Shahe bat-ha hai humara

Is khaak se ta’meer Mazaare Shahe kaunain
Ma’moor isi khaak se Qibla hai Humara

Hum khaak udaenge jo woh khaak na paayi
Aabaad Raza jis pe Madina hai humara.

© Naat Sharif - Naat Lyrics, Hamd, Naats, Manqabats, Salaams., AllRightsReserved.

Maintained by Naat Sharif Channel